श्याम घिमिरे
असोज २६,
देउराली यातायात अर्घाखाँची प्रा.लि ले आफ्नो संस्थामा आवद्ध सबै गाडी धनिहरुलाई बोनस बितरण गर्ने भएको छ । संस्थामा आबद्ध १५८ गाडी धनिहरुलाई बिजया दशमिको अवसरपारी बोनस बितरण गर्न लागीएको प्रालिका अध्यक्ष गोबिन्द बन्जाडेले बताउनुभयो । सुक्रवार सन्धिखर्कमा आयोजित बिजया दशमी २०८० को शुभकामना आदान प्रदान तथा अन्र्तक्रिया कार्यक्रममा बोल्दै अध्यक्ष बन्जाडेले प्रत्येक गाडी धनिलाई साढे ५२ हजार र कर्मचारीलाई १० हजार रुपैयाका दरले बोनस बाड्ने बताउनुभयो । कर्मचारीलाई बितरण गरीने बोनस रकम भने देउराली बहुउद्देश्यीय सहकारी संस्थामा शेयर सदस्यमा आवद्धता बापत बितरण गरीएको अध्यक्ष बन्जाडेले जानकारी दिनुभयो ।

प्रालिले यस अघि सहकारीमा आबद्धता हुन भन्दै सबै गाडी धनिहरुलाई ३५ हजारका दरले बोनश रकम बितरण गरेको थियो । पछिल्लो समय यातायात व्यवसायको क्षेत्रमा पनि प्रतिस्पर्धा हुने गरेको र सवारी संख्या समेत दिनप्रतिदिन बढ्दै गइरहेको परिवेशमा व्यवसायीहरुको आम्दानीमा कमी आएको र व्यवसायीको लगानीको सुरक्षा एवं लगानीमैत्री बातावरण निर्माण गर्ने उद्देश्यले बिभिन्न समयमा बोनस संगै राहत वितरण गरीएको अध्यक्ष बन्जाडेले बताउनुभयो ।

प्रालिले कोरोना महामारीको समयमा कोरोना नियन्त्रमा सहयोग पुगोस भन्ने हेतुले अर्घाखाँचीका ६ वटै स्थानिय तहहरुलाई १ लाख १ हजारका दरले रु ६ लाख ६ हजार रुपैया बितरण गरेको थियो । सोहि समयमै कोरोनाको मारमा परेको भन्दै प्रालिले गाडी धनिलाई ४३ हजार, सावारी चालकलाई ५ हजार र सहचालकलाई रु ३ हजारका दरले झण्डै ७० लाख रुपैया रातह बितरण गरेका प्रालिका महासचिव प्रेम पाण्डेले जानकारी दिनुभयो । संस्थाले आफुहरुलाई पटक पटक बोनस सहित राहत र सुविधा प्रदान गरेको भन्दै व्यवसायीहरुले खुसि व्यक्त गरेका छन । बोनसले व्यवसाय प्रवद्र्धन गर्न थप मद्दत पुगेको उनिहरुको भनाई रहेको छ ।

यसैबिच नजिकिदै गरेको चाडपर्वलाइ मध्यनजरगरी गाडीहरु थपेरै भएपनि यात्रुहरुलाई सहज सेवा दिने प्रालिका अध्यक्ष बन्जाडेले प्रतिबद्धता व्यक्त गर्नुभएको छ । बन्जाडेले चाडपर्बको बहानामा तोकिएको भन्दा बढी भाडा नउठाउन सबै ब्यवसायीहरुलाई आग्रह पनि गर्नुभएको हो । तोकिएको भन्दा बढी भाडा उठाएमा कारबाही गर्ने भन्दै बन्जाडेले यात्रुलाई सहज रुपमा यात्रा गराउनु नै आफुहरुको पहिलो प्राथमिकता रहेको दाबि समेत गर्नुभयो ।

कार्यक्रममा प्रालिका उपाध्यक्ष भेष बहादुर बिसी,कोषाध्यक्ष नारायण खड्का, देउराली यातयातका पुर्व अध्यक्ष योगेन्द्र खड्का,गाडी धनी अशोक कुमार श्रेष्ठ, बलराम भुसाल,पत्रकार महासंघका अध्यक्ष अशोक खनाललगायत जिल्लामा क्रियाशिल पत्रकारहरुको उपस्थिति रहेको थियो ।

२०६१ सालमा स्थापना भई छोटो समयमा शहर देखी गाउँका कुनाकन्दाराहरुमा आफ्नो सेवा विस्तार गरेको देउराली यातायात प्रालिमा हाल १०७ वटा सवारी जिप,४७ वटा हाईस गाडी र ४ वटा मिनि बसहरुले सेबा दिई रहेका छन । बिभिन्न सामाजिक कार्यहरुमा समेत सक्रिय रहेको प्रालिले गत फागुन १३ गते सन्धिखर्कमा एकदिने निशुल्क स्वास्थ्य शिविर समेत सञ्चालन गरेको थियो ।